ఉక్రెయిన్‌లోని విన్నిట్సియా ఎయిర్‌పోర్టు పూర్తిగా ధ్వంసం
ఉక్రెయిన్‌పై దండయాత్ర చేస్తున్న రష్యా భీకర పోరు సాగిస్తుంది. ముఖ్యంగా, ఉక్రెయిన్ దేశంలోని ఆస్తుల ధ్వంసమే లక్ష్యంగా ఈ యుద్ధం సాగుతోంది. దీంతో ఉక్రెయిన్‌లోని అనేక ప్రైవేటు, ప్రభుత్వ భవనాలు నేలమట్టమవుతున్నాయి. తాజాగా ఉక్రెయిన్‌లోని ప్రధాన విమానాశ్రయాల్లో ఒకటైన విన్నిట్సియాపై బాంబుల వర్షం కురిపించింది.
దీంతో ఆ విమానాశ్రయం పూర్తిగా దెబ్బతిన్నది. రష్యా సైన్యం ఎనిమిది రాకెట్లతో ఈ విమానాశ్రయాన్ని పూర్తిగా ధ్వంసం చేసినట్టు ఉక్రెయిన్ అధినేత జెలెన్ స్కీ వెల్లడించారు. బాంబుల మోతతో ధ్వంసమైన విమానాశ్రయం నుంచి దట్టమైన పొగలు కమ్ముకొస్తున్న వీడియో వైరల్ అయింది.
ప్రపంచ దేశాల ఎంతగా ఒత్తిడి చేస్తున్నప్పటికీ రష్యా ఏమాత్రం వెనక్కి తగ్గడం లేదు. దీంతో జెలెన్ స్కీ మరోమారు ఓ వీడియో సందేశాన్ని విడుదల చేశారు. విమానాశ్రాయాలను కూడా వదలిపెట్టడం లేదంటూ ఆవేదన వ్యక్తం చేశారు.
రష్యా నుంచి తమ దేశాన్ని రక్షించేందుకు ఉక్రెయిన్ గగనతలాన్ని నో ఫ్లై జోన్‌గా ప్రకటించాలని ప్రకటించాలని ప్రతి రోజూ అభ్యర్థిస్తున్నామని, ఒకవేళ అలా ప్రకటించే ధైర్యం లేకుంటే కనీసం ఆయుధాలైనా ఇవ్వాలని ఆయన విజ్ఞప్తి చేశారు.
