స్టార్ రెజ్లర్ వినేశ్ ఫోగాట్‌కు షాక్... తాత్కాలిక నిషేధం
భారత స్టార్ రెజ్లర్ వినేశ్ ఫోగాట్‌కు గట్టి ఎదురుదెబ్బ తగలిగింది. ఇటీవల టోక్యోలో జరిగిన ఒలింపిక్స్ క్రీడల్లో ఖచ్చితంగా పతకం సాధిస్తుందని ప్రతి ఒక్కరూ భావించారు. కానీ, రెజ్లర్ వినేశ్ ఫోగాట్ నిరాశ పరిచింది. అంతేకాకుండా, ఇప్పుడో వివాదంలో చిక్కుకుంది.
ఒలింపిక్స్‌కు సన్నద్ధమయ్యేందుకు హంగేరీ వెళ్లిన వినేశ్ ఫోగాట్ అక్కడ నుంచి టోక్యో చేరుకుంది. ఇతర రెజ్లర్లు భారత్ నుంచి టోక్యో వెళ్లారు. అయితే టోక్యో ఒలింపిక్స్ క్రీడాగ్రామంలో వారితో కలిసి ఉండేందుకు వినేశ్ ఫోగాట్ నిరాకరించింది.
తాను హంగేరీ నుంచి వచ్చానని, వారు భారత్ నుంచి వచ్చారని, వారి నుంచి తనకు కరోనా సోకే అవకాశాలు ఉన్నాయన్న వినేశ్ పేర్కొంటూ వారికి దూరంగా ఉన్నారు. భారత బృందంతో కలిసి ఉండకపోగా, వారితో కలిసి ప్రాక్టీసు కూడా చేయలేదట.
అంతేకాదు, మ్యాచ్‌ల సందర్భంగా అధికారిక స్పాన్సర్ కిట్లను కూడా ధరించలేదని భారత రెజ్లింగ్ సమాఖ్య ఆమెపై ఆరోపణలు చేసింది. ఈ క్రమంలో రెజ్లింగ్ సమాఖ్య భారత్ తిరిగొచ్చిన వినేశ్‌కు నోటీసులు జారీ చేసి, తాత్కాలిక నిషేధం విధించింది.
ఈ నెల 16 లోగా ఆరోపణలపై వివరణ ఇవ్వాలని నోటీసుల్లో పేర్కొన్నారు. వినేశ్ తప్పు చేసినట్టు తేలితే మాత్రం శిక్ష తీవ్రంగా ఉండే అవకాశం ఉంది. అటు టోక్యో ఒలింపిక్స్ పోటీల్లో ఓడిపోయి తీవ్ర నిరాశలో ఉన్న వినేశ్ ఫోగాట్‌కు రెజ్లర్ సమాఖ్య తీసుకున్న నిర్ణయం శరాఘాతంగా మారే ప్రమాదం లేకపోలేదు.
