మావోయిస్టులు అమర్చినట్లు బాంబు అలా పేలింది.. ఒకరు మృతి
తెలంగాణలోని ములుగు జిల్లాలోని అటవీప్రాంతంలో సోమవారం మావోయిస్టులు అమర్చినట్లు అనుమానిస్తున్న బాంబు పేలడంతో ఒకరు మృతి చెందారు. ఛత్తీస్గఢ్ సరిహద్దులోని వాజేడు మండలం కొంగాల గ్రామ సమీపంలో ఈ ఘటన చోటుచేసుకుంది.
ఐదుగురు వ్యక్తుల బృందం కట్టెలు సేకరించడానికి ఒక కొండపైకి వెళ్ళింది. వారిలో ఒకరు మావోయిస్టులు దాచి ఉంచినట్లు అనుమానిస్తున్న బాంబును తొక్కడంతో పేలుడు సంభవించింది. దీంతో అతను అక్కడికక్కడే మృతి చెందాడు.
బాధితుడిని జగన్నాథపురం గ్రామానికి చెందిన యెల్లందుల యేసు (55)గా గుర్తించారు. మరో నలుగురు భయంతో పారిపోయి గ్రామస్థులను అప్రమత్తం చేశారు.
సమాచారం అందుకున్న పోలీసులు అటవీప్రాంతానికి చేరుకున్నారు. ఈ ప్రాంతంలో మావోయిస్టులు మందుపాతర అమర్చారని అనుమానం ఉన్నందున సంఘటనా స్థలాన్ని సందర్శించవద్దని వారు గ్రామస్తులను హెచ్చరించారు.
ఈ ప్రాంతంలో మావోయిస్టులు ఉన్నారనే అనుమానంతో పోలీసులు అప్రమత్తమై కూంబింగ్‌ ఆపరేషన్‌ చేపట్టారు. పొరుగు రాష్ట్రంలో మావోయిస్టుల కార్యకలాపాలు విపరీతంగా పెరిగిపోతున్న నేపథ్యంలో ఛత్తీస్గఢ్ సరిహద్దు ప్రాంతాల్లో తెలంగాణ పోలీసులు నిఘా ఉంచారు.
గత దశాబ్ద కాలంగా ఛత్తీస్గఢ్, మహారాష్ట్ర సరిహద్దు జిల్లాల్లో గట్టి నిఘాతో తెలంగాణలో మావోయిస్టు కార్యకలాపాలను పోలీసులు విజయవంతంగా అదుపు చేశారు.
