భారత స్టార్ బ్యాటర్ విరాట్ కోహ్లీ రికార్డును బ్రేక్ చేసిన శుభ్‌మన్ గిల్

Written By: సెల్వి

Updated: Wed, 17 Jun 2026 (19:10 IST)

Gill

భారత స్టార్ బ్యాటర్ విరాట్ కోహ్లీ రికార్డును టీమిండియా కెప్టెన్‌ శుభ్‌మన్ గిల్ బ్రేక్ చేశాడు. స్వదేశంలో వన్డే ఫార్మాట్‌లో అత్యంత వేగంగా 1000 పరుగులు పూర్తి చేసిన బ్యాటర్‌గా నిలిచాడు. ఆఫ్ఘ‌నిస్థాన్‌తో లక్నో వేదికగా జరుగుతున్న రెండో వన్డేలో ఈ ఘనత సాధించాడు. అద్భుతమైన ఫామ్‌తో ఆకట్టుకున్న గిల్, ఈ మ్యాచ్‌లో అర్ధశతకం పూర్తి చేసి జట్టును ఆదుకున్నాడు. ఈ మ్యాచ్‌లో స్టార్ బ్యాట‌ర్‌ రోహిత్ శర్మ కూడా మరో మైలురాయిని అందుకున్నాడు. లిస్ట్ ఏ క్రికెట్‌లో 14,000 పరుగులు పూర్తి చేసిన ఆటగాడిగా నిలిచాడు. మూడు వన్డేల ఈ సిరీస్‌లో ఇప్పటికే భారత్ శుభారంభం చేసింది. తొలి వన్డేలో 7 వికెట్ల తేడాతో ఘనవిజయం సాధించి 1-0 ఆధిక్యంలో ఉన్న విషయం తెలిసిందే. 

మరోవైపు భారత మాజీ కెప్టెన్ మహమ్మద్ అజారుద్దీన్, వివిధ ఫార్మాట్ల నుంచి శుభ్‌మన్ గిల్ గైర్హాజరుపై, అలాగే టెస్టు జట్టులో సర్ఫరాజ్ ఖాన్, ఆకిబ్ నబీలకు చోటు దక్కకపోవడంపై ప్రశ్నలు లేవనెత్తారు. టెస్టులు, వన్డేలలో భారత జట్టుకు నాయకత్వం వహిస్తున్న గిల్, ఆ బాధ్యతను చాలా సమర్థవంతంగా నిర్వహించారని, కాబట్టి అతన్ని ఏ ఫార్మాట్ నుంచీ తప్పించి ఉండకూడదని అజారుద్దీన్ పేర్కొన్నారు. టీ20లలో భారత వైస్-కెప్టెన్‌గా ఉన్న గిల్, ఈ ఏడాది ప్రారంభంలో జరిగిన టీ20 ప్రపంచ కప్‌కు ముందు జట్టు నుంచి తొలగించబడ్డారు.

వారి వయసు దాటిపోయిన తర్వాత ప్రదర్శన చేయడానికి అవకాశం ఇవ్వడంలో అర్థం ఏముంది.. నబీ అంత గొప్ప టీ20 బౌలర్ కాకపోవచ్చు, కానీ అతను టెస్ట్ క్రికెట్‌కు మాత్రం చాలా బాగా సరిపోతాడనే విషయాన్ని గుర్తించాలని.. భారత్ మరింత ఎక్కువగా టెస్ట్ క్రికెట్ ఆడాల్సిన అవసరం ఉందని అజారుద్దీన్ పేర్కొన్నారు.