#రోహిత్ శర్మ అద్భుతమైన క్యాచ్- రిషబ్ పంత్‌పై కుళ్లు జోకులు (video)
న్యూజిలాండ్‌తో జరిగిన తొలి టీ-20 మ్యాచ్‌లో టీమిండియా ఓపెనర్ రోహిత్ శర్మ అద్భుత ఫీల్డింగ్ చేశాడు. అద్భుతమైన క్యాచ్‌తో ఆకట్టుకున్నాడు. బౌండరీలైన్ వద్ద రిలే క్యాచ్‌తో క్రికెట్ ఫ్యాన్సుకు షాకిచ్చాడు. ఈ షాట్‌ను కొట్టిన న్యూజిలాండ్ ప్లేయర్ మార్టిన్ గప్టిల్.. రోహిత్ క్యాచ్‌ను చూసి షాకయ్యాడు. నిరాశగా పెవిలియన్ చేరాడు. ఈ క్యాచ్‌కు సంబంధించిన ఫోటోలు ప్రస్తుతం నెట్టింట వైరల్ అవుతున్నాయి.
ఇదే మ్యాచ్‌లో కేఎల్ రాహుల్ అద్భుత బ్యాటింగ్ నేపథ్యంలో సోషల్ మీడియా వేదికగా కుళ్లు జోకులు పేలుతున్నాయి. ముఖ్యంగా యువ వికెట్ కీపర్ రిషభ్ పంత్‌ను ఉద్దేశించి నెటిజన్లు ఒక ఆటఆడుకుంటున్నారు. తమ ఎడిటింగ్ నైపుణ్యానికి పనిచెబుతూ ఫన్నీ మీమ్స్‌తో ట్రోల్ చేస్తున్నారు. ఆస్ట్రేలియా సిరీస్‌లో పంత్ గాయపడటంతో అనూహ్యంగా వికెట్ కీపింగ్ బాధ్యతలు అందుకున్న రాహుల్ రఫ్ఫాడిస్తున్నాడు. అటు బ్యాటింగ్.. ఇటు కీపింగ్‌లో దూసుకుపోతున్నాడు.
ఈ నేపథ్యంలో కెప్టెన్ కోహ్లీ సైతం స్పెషలిస్ట్ కీపర్ అయిన పంత్‌ను పక్కనపెట్టి రాహుల్‌కే కీపింగ్ బాధ్యతలు అప్పజెప్పాడు. అతను కూడా కెప్టెన్ నమ్మకం కోల్పోకుండా అదరగొట్టాడు. దీంతో పంత్ అవసరం జట్టుకు లేదని అభిమానులు కామెంట్ చేస్తున్నారు. తట్టా బుట్టా సర్థుకోమనే అర్థంతో మీమ్స్‌ను ట్రెండ్ చేస్తున్నారు. ఇక రాహుల్ బ్యాటింగ్ ఆర్డర్‌పై కూడా జోకులు పేల్చుతున్నారు. అతని నిలకడైన పెర్ఫామెన్స్‌పై ప్రశంసల జల్లు కురిపిస్తున్నారు.
