కోన్ ఐస్‌క్రీమ్‌లో మనిషి వేలు : షాకైన వైద్యుడు!!
ప్రతి ఒక్కరికీ ఎంతో ఇష్టమైనది ఐస్క్రీమ్. అయితే, ఓ వైద్యుడు కొనుగోలు చేసిన కోన్ ఐస్‌క్రీమ్‌లో మనిషి వేలు కనిపిచింది. దీన్ని చూసిన ఆ వైద్యుడు తేరుకోలేని విధంగా షాక్‌కు గురయ్యాడు. ఈ భయానక సంఘటన ముంబైలో వెలుగు చూసింది. ఈ వివరాలను పరిశీలిస్తే, ముంబైకు చెందిన చెందిన యువ డాక్టర్‌ ఓర్లెమ్‌ బ్రెండన్‌ సెర్రావో తన సోదరితో కలిసి బుధవారం ఆన్‌లైన్‌ డెలివరీ యాప్‌లో మూడు ఐస్‌క్రీమ్‌లు ఆర్డర్ పెట్టాడు.
వారు ఆర్డర్ ఇచ్చినట్టుగానే 'ది యుమ్మో బటర్‌స్కాచ్‌' ఫ్లేవర్‌ కోన్ ఐస్‌క్రీమ్‌లను ఆ సంస్థ డెలివరీ చేసింది. అతడు దానిని తినడం మొదలుపెట్టాక.. నాలుకకు ఏదో గట్టిగా తగలడం మొదలైంది. దీంతో అనుమానం వచ్చి దానిని పరీక్షగా చూడగా.. 2 అంగుళాల మనిషి వేలిని గుర్తించాడు. అతడు స్వయంగా డాక్టర్‌ కావడంతో వెంటనే దానిని ధ్రువీకరించుకోగలిగాడు. ఒక్కసారిగా అతడు దిగ్భ్రాంతికి గురయ్యాడు.
ఆ తర్వాత అతడు తేరుకొని మలాడ్‌లోని పోలీస్‌ స్టేషన్‌లో ఈ విషయంపై ఫిర్యాదు చేశాడు. అధికారులు కూడా వెంటనే ఎఫ్‌ఐఆర్‌ నమోదు చేసి విచారణ చేపట్టారు. ఈ ఘటనపై పోలీసులు స్పందిస్తూ, ఆ వేలును ఫోరెన్సిక్‌ పరీక్షలకు పంపినట్లు వెల్లడించారు. ఇక ఆ ఐస్‌క్రీం తయారు చేసిన సంస్థ ప్రాంగణంలో కూడా తనిఖీలు నిర్వహిస్తామన్నారు. ఈ విషయాన్ని తాము తీవ్రంగా పరిగణిస్తున్నట్లు పేర్కొన్నారు. మరోవైపు ఆ ఐస్క్రీమ్ తయారీ సంస్థ ఇప్పటివరకు ఈ ఘటనపై స్పందించకపోవడం గమనార్హం.
