కాంగ్రెస్ పార్టీకి గుడ్ బై చెప్పిన గాలి అనిల్ కుమార్
తెలంగాణ అసెంబ్లీ ఎన్నికల వేళ కాంగ్రెస్ పార్టీకి షాక్ తగిలింది. తాజాగా సీనియర్ నేత, టీపీసీసీ ఉపాధ్యక్షుడు గాలి అనిల్ కుమార్ కూడా కాంగ్రెస్ పార్టీకి గుడ్ బై చెప్పారు. కాంగ్రెస్ పార్టీకి రాజీనామా చేసినట్లు గాలి అనిల్ కుమార్ ప్రకటించారు.
తన రాజీనామా లేఖను ఏఐసీసీ అధ్యక్షుడు మల్లికార్జున ఖర్గేకు పంపారు. కాంగ్రెస్ పార్టీ అభివృద్ధికి ఎంతో కృషి చేసినా సరైన గుర్తింపు రాలేదన్నారు. పార్టీ కోసం పని చేశానని, అన్ని విధాలా నష్టపోయానని రాజీనామా లేఖలో పేర్కొన్నారు.
"నా విషయంలో ఇటీవలి పరిణామాలు నా అభిమానులను, కార్యకర్తలను తీవ్రంగా కలవరపరిచాయి. చాలామంది నా వద్దకు వచ్చి పార్టీ నాతో వ్యవహరించిన తీరుతో తమ మనోభావాలు దెబ్బతిన్నాయని ఆవేదన వ్యక్తం చేశారు.
కాంగ్రెస్ పార్టీ కోసం చిత్తశుద్ధితో పనిచేసిన వారికి పార్టీలో సరైన మార్గదర్శకత్వం లభించడం లేదు. పార్టీ కోసం కష్టపడి అన్ని విధాలా ఓడిపోయాను. నా కార్యకర్తలు, అభిమానుల ఒత్తిడి, మనోభావాలను గౌరవిస్తూ కాంగ్రెస్ పార్టీ ప్రాథమిక సభ్యత్వానికి, పదవులకు రాజీనామా చేస్తున్నా" అని ఖర్గేకు రాసిన లేఖలో అనిల్ కుమార్ తెలిపారు.
అలాగే నర్సాపూర్ నుంచి అనిల్ కుమార్ కాంగ్రెస్ పార్టీ టికెట్ ఆశించారు. అయితే కాంగ్రెస్ అధిష్టానం తనకు టికెట్ కేటాయించకపోవడంతో అసంతృప్తితో ఉన్నారు. ఈ క్రమంలో గాలి అనిల్ కుమార్ తన అనుచరులతో సమావేశం నిర్వహించి కాంగ్రెస్ పార్టీకి రాజీనామా చేయాలని నిర్ణయించుకున్నారు. కానీ గాలి అనిల్ కుమార్ బీఆర్‌ఎస్‌లో చేరేందుకు రంగం సిద్ధమైంది.
