రైట‌ర్ ట‌ర్న్‌డ్ డైరెక్ట‌ర్‌తో సుధీర్ బాబు సినిమా
సమ్మోహనం, నన్ను దోచుకుందువటే.. చిత్రాల‌తో ప్రేక్ష‌కులను ఆక‌ట్టుకున్న యువ హీరో సుధీర్ బాబు మరో క్రేజీ ప్రాజెక్ట్ పట్టాలెక్కించే ప్రయత్నం చేస్తున్నాడు. ఈసారి రైట‌ర్ ట‌ర్న‌డ్ డైరెక్ట‌ర్‌తో సినిమా చేసేందుకు ప్లాన్ చేస్తున్నాడ‌ట. ఇంత‌కీ ఆ రైట‌ర్ ట‌ర్న‌డ్ డైరెక్ట‌ర్ ఎవ‌ర‌నుకుంటున్నారా..? అమృతం సీరియల్ ద్వారా నటుడిగా సుపరిచితుడైన హర్షవర్ధన్ ఆ తర్వాత రైట‌ర్‌గా మారి స‌క్స‌ెస్ సాధించాడు. ఇష్క్, మ‌నం చిత్రాల‌కు ర‌చ‌యిత‌గా వ‌ర్క్ చేసాడు.
ఆ మధ్య గుడ్, బ్యాడ్, అగ్లీ అనే సినిమాకు మొదటిసారి దర్శకత్వం వహించాడు. అంతేకాకుండా ఆ సినిమాకు సంగీతం కూడా ఆయనే సమకూర్చారు. ఆ సినిమాకు సంబంధించిన ట్రైలర్, రెండు పాటలు విడుద‌లై అందరిని ఆకట్టుకున్నాయి, సంగీతం ఇళయరాజాను తలపిస్తుండగా, ఫస్ట్ అటెంప్ట్‌లోనే అనుభవం ఉన్న డైరెక్టర్‌గా సినిమాను తీసాడని ట్రైలర్ చూసినవారు అన్నారు.
కానీ, ఎందుకో ఆ సినిమా ఇంకా విడుదల కాలేదు. ఇక అసలు విష‌యానికి వ‌స్తే... రీసెంట్‌గా హర్షవర్ధన్ సుధీర్ బాబుకు ఓ క‌థ చెప్పాడ‌ట. ఆ క‌థ నచ్చడంతో ఈ ప్రాజెక్టును సెట్స్ పైకి తీసుకెళ్లేందుకు ప్రయత్నాలు చేస్తున్నట్లు సమాచారం. త్వరలోనే సినిమాకు సంబందించిన అధికారిక ప్రకటన రానున్నట్లు సమాచారం.
