'లక్ష్మీస్ ఎన్టీఆర్' కలెక్షన్ల వర్షం... చిన్నబోయిన బాలయ్య
వివాదాస్పద దర్శకుడు రాంగోపాల్ వర్మ నిర్మించిన చిత్రం "లక్ష్మీస్ ఎన్టీఆర్". ఒక్క ఆంధ్రప్రదేశ్ రాష్ట్రంలో మినహా ప్రపంచ వ్యాప్తంగా గత నెల 29వ తేదీన ప్రేక్షకుల ముందుకు వచ్చింది. ఈ చిత్రం తొలి ఆట నుంచే మంచి టాక్‌ను సొంతం చేసుకోవడమేకాకుండా కలెక్షన్ల వర్షం కురిపిస్తోంది. నిజానికి రాంగోపాల్ వర్మ ప్రస్తుతం ఫామ్‌లో లేడు, పైగా ఈ చిత్రంలో అందరూ కొత్త నటీనటులు అయినప్పటికీ ఈ సినిమా చుట్టూ ఉన్న వివాదాల వల్ల ప్రేక్షకులు కూడా ఈ చిత్రానికి బ్రహ్మరథం పడుతున్నారు.
కేవలం తెలంగాణ రాష్ట్రంలోనే కాకుండా, ఓవర్సీస్‌లో కూడా దుమ్మురేపుతోంది. ఈ చిత్రం ఓవర్సీస్‌లో ఇప్పటికే ఎన్టీఆర్ బయోపిక్ చిత్రాన్ని మించిపోయింది. ఓ ఓవర్సీస్‌లో 'ఎన్టీఆర్ మహానాయకుడు' సినిమా రెండు రోజుల్లో 2,16,458 డాలర్లు వసూలు చేయగా, కానీ 'లక్ష్మీస్ ఎన్టీఆర్' మాత్రం 2,18,700 డాలర్లు వసూలు చేసింది. ఇదే ఇపుడు చర్చనీయాంశంగా మారింది.
నిజానికి ఎన్టీఆర్ జీవిత చరిత్ర ఆధారంగా వచ్చిన 'కథానాయకుడు', 'మహానాయకుడు' చిత్రాలపై ప్రేక్షకులు భారీ అంచనాలే పెట్టుకున్నారు. దీనికి కారణం అగ్రహీరో బాలకృష్ణ నటిస్తుండటం, క్రిష్ దర్శకత్వం వహించడమే. పైగా, అనేక మంది అగ్రహీరోహీరోయిన్లు వివిధ రకాల పాత్రలను పోషించారు. కానీ ఈ రెండు చిత్రాలు బాక్సాఫీస్ వద్ద బోల్తాపడ్డాయి. అటు కలెక్షన్ల పరంగా కూడా పూర్తిగా నిరాశపరిచాయి. ఇపుడు 'లక్ష్మీస్ ఎన్టీఆర్' చిత్రం కలెక్షన్ల వర్షం కురిపిస్తుండటంతో బాలకృష్ణ చిన్నబోయినట్టు సమాచారం.
