'వారసుడు' విడుదల వాయిదా.. 11న కాదు.. 14న రిలీజ్ : దిల్ రాజు
తమిళ స్టార్ హీరో విజయ్ నటించిన తాజా చిత్రం "వారసుడు". తమిళంలో "వారిసు". ఈ చిత్రం తెలుగు వెర్షన్ విడుదల తేదీని వాయిదా వేశారు. తమిళ వెర్షన్ అనుకున్నట్టుగానే జనవరి 11వ తేదీన విడుదల చేస్తామని, తెలుగు వెర్షన్ మాత్రం జనవరి 14వ తేదీన విడుదల చేయనున్నట్టు అధికారికంగా ప్రకటించారు.
ఇదే అంశంపై ఆయన సోమవారం ఓ కీలక ప్రకటన చేశారు. "వారసుడు" సినిమా విడుదలను వాయిదా వేస్తున్నట్టు ప్రకటించారు. షెడ్యూల్ ప్రకారం ఈ నెల 11వ తేదీన కాకుండా 14వ తేదీన విడుదల చేస్తున్నట్టు తెలిపారు. తమిళ వెర్షన్ మాత్రం యథావిధిగా 11వ తేదీన విడుదల చేస్తామని తెలిపారు. చిరంజీవి, బాలకృష్ణ చిత్రాలకు ఎక్కువ థియేటర్లు కావాలని, అందుకే ఈ నిర్ణయం తీసుకున్నట్టు తెలిపారు.
థియేటర్లకు పోటీ ఉండకూడదనే ఉద్దేశ్యంతో ఈ నిర్ణయం తీసుకున్నానని, తానే ఒక అడుగు వెనక్కి వేశానని చెప్పారు. అందరూ తనపై ఏడి ఏడుస్తున్నారని, పండ్లున్న చెట్టుకే ఎక్కువ రాళ్లు దెబ్బలు పడతాయని వ్యాఖ్యానించారు. తనను ఎవరూ కార్నర్ చేయలేరని, ఆ పరిస్థితి అస్సలు తెచ్చుకోనని దిల్ రాజు పేర్కొన్నారు.
