పుదీనా ఆకులు ముద్దగా నూరి అలా చేస్తే...
పుదీనాను వంటల్లో ఉపయోగిస్తే, మంచి రుచితో పాటు వాసన కూడా ఇస్తుంది. దీనిలో ఔషధ గుణాలు కూడా మెండుగా ఉన్నాయి. ఆయుర్వేదంలో దీనికి ప్రత్యేక స్థానం ఉంది. చూయింగ్ గమ్, టూత్ పేస్ట్, మరెన్నో మందుల్లో ఎలా వాడినా పుదీనా తాజాదనాన్ని చక్కగా అందిస్తుంది. ఇంకా మాంగనీస్, విటమిన్ ఎ, విటమిన్ సి ఇందులో పుష్కలంగా ఉన్నాయి.
పీచు, ఫోలేట్, ఐరన్, మేగ్నీషియం, క్యాల్షియం, విటమిన్ బి2, ఒమెగా-3 ఫ్యాటి యాసిడ్స్, పొటాషియం, కాపర్ లభిస్తాయి. పుదీనా ఆకులు, నూనె, విత్తనాలు, ఇతర భాగాలు అనేక రకాల వ్యాధులకు నివారిణిగా పనిచేస్తాయి. ఆయుర్వేద వైద్య సలహాను అనుసరించి మాత్రమే పుదీనాను ఆయా వ్యాధుల నివారణకై ఉపయోగించాలి. తలనొప్పిగా ఉన్నప్పుడు పుదీనా ఆకులు ముద్దగా నూరి నుదిటిపై రాయాలి. ఆకులు నలిపి వాసన చూస్తే మంచిది.
పుదీనా ఆకుల పేస్ట్‌ను రాత్రి తలకు పట్టించి పొద్దుటే తలస్నానం చేసినట్లయితే, జుట్టు రాలటం, పేలు తగ్గుతాయి. పుదీనా కషాయం రోజూ 2 సార్లు తాగితే జలుబు, దగ్గు తగ్గుతాయి. గొంతునొప్పిగా ఉన్నప్పుడు పుదీనా కషాయంలో ఉప్పు కలిపి పుక్కిలించాలి. ఎండిన ఆకుల పొడితో పళ్లు తోముకోవాలి. పుదీనాతో చేసిన మెంథాల్ దంత వ్యాధులపై ప్రభావవంతంగా పనిచేస్తుంది.
ప్రతి రోజూ ఆకులు తరచుగా నమిలి తినాలి. పుదీనా నూనెతో లవంగ నూనె కలపాలి. ఆ మిశ్రమంలో దూదిని తడిపి పెడితే పిప్పి పళ్ళు నొప్పి నుండి ఉపశమనం పొందవచ్చు. పుదీనా నూనెను మొటిమల పైన రాసినట్లయితే అవి తగ్గిపోతాయి. స్వరపేటిక ఆరోగ్యానికి పుదీనా రసం తాగాలి.
