16 నెలల చిన్నారికి అరుదైన వ్యాధి.. ఇంజెక్షన్ ధర రూ.16కోట్లు.. సోనూ సాయం
కరోనా సమయంలో పేదల పాలిట ఆపద్భాంధవుడిగా నిలిచిన రియల్ హీరో సోనూసూద్ మరోసారి తన మంచి మనసును చాటుకున్నాడు. అరుదైన వ్యాధితో బాధపడుతున్న ఓ చిన్నారికి తనవంతు సాయం అందచేశారు.
మహారాష్ట్రకు నాగ్పూర్కు చెందిన 16 నెలల చిన్నారి విహాన్ స్పైనల్ మస్కులర్ ఆత్రోపి అనే అరుదైన వ్యాధితో బాధపుడుతున్నాడు. ఈ వ్యాధికి జాల్ గెన్జ్ మా అనే ఇంజెక్షన్ ఇవ్వాలి. అమెరికాలో ఉండే ఈ ఇంజక్షన్ ఇవ్వాలంటే రూ. 16 కోట్లు ఖర్చు చేయాలి.
ఆ చిన్నారి ప్రాణాలు దక్కాలంటే రెండు నెలల్లో రూ. 16 కోట్ల ఖరీదైన ఇంజక్షన్ ఇవ్వాల్సి ఉంటుంది.. అయితే అంత ఖరీదైన ఇంజెక్షన్ ఇప్పించే స్థోమత ఆ బాబు తల్లిదండ్రులకు లేదు. డాక్టర్ విక్రాంత్, మీనాక్షి అకుల్వార్ తమ బిడ్డను బతికించుకోవాలని తాపత్రయపడుతున్నారు.
దీంతో రూ. 16 కోట్లను సేకరించేందుకు విరాళాలు చేపట్టారు. సోషల్ మీడియా.. సన్నిహితుల ద్వారా తమ బిడ్డను బతికించుకోవడానికి విరాళాలు చేపట్టారు.
అయితే ఇప్పటివరకు ఈ చిన్నారికి సాయం చేసేందుకు బాలీవుడ్ స్టార్స్ అభిషేక్ బచ్చన్, మనోజ్ బాజ్పాయ్ వంటి ప్రముఖులు స్పందించి సాయం చేసేందుకు ముందుకొచ్చారు. అలాగే సోనూసూద్ కూడా తనవంతు సాయం చేశాడు.
ఇప్పటివరకు వచ్చిన రూ. 4 కోట్ల విరాళాల్లో ఆయనదే ఎక్కువ భాగం ఉంది. అంతేకాకుండా.. ఆసుపత్రికి వెళ్లి ఆ చిన్నారిని పరామర్శించాడు. ఇక విహాన్ బతకాలంటే నెల రోజుల్లో రూ. 12 కోట్లు సమకూర్చాలి. దాతలు ముందుకు వచ్చి విరాళాలు అందించాలి కోరుకున్నారు.
