మంగళవారం, 16 జులై 2024
  1. వార్తలు
  2. తెలుగు వార్తలు
  3. తెలుగు వార్తలు
Written By ఠాగూర్

తెలుగుదేశం పార్టీపై ప్రేమ కాదు.. చంద్రబాబు అంటే గౌరవం : పవన్ కళ్యాణ్

pawan kalyan
తాను కమ్మ కులస్తులకు కొమ్ము కాస్తున్నానని, తెలుగుదేశం పార్టీని అందలమెక్కించేందుకు ప్రయత్నిస్తున్నానంటూ వైకాపా మంత్రులు, కొందరు కాపు నేతలు తనను లక్ష్యంగా చేసుకుని చేస్తున్న ప్రచారానికి జనసేన పార్టీ అధినేత పవన్ కళ్యాణ్ మచిలీపట్నం వేదికగా సరిగా సమాధానం చెప్పారు. తనకు తెలుగుదేశం పార్టీ అంటే ప్రేమ లేదన్నారు. టీడీపీ అధినేత చంద్రబాబు నాయుడు అంటే తనకు ఆరాధ్యభావమేదీ లేదన్నారు. ఆయన 14 యేళ్లపాటు ముఖ్యమంత్రిగా పని చేశారని గుర్తుచేశారు. సమర్థుడు కాబట్టే గౌరవిస్తున్నానని చెప్పారు. ఇప్పటి ముఖ్యమంత్రి కూడా రాజ్యాంగ పదవిలో ఉన్నాడు కాబట్టి, ప్రజలు ఓటేసి ఎన్నుకున్నారు కాబట్టి ఆయనకు జన్మదిన శుభాకాంక్షలు చెబుతుంటానని వివరించారు. 
 
ఇకపొత్తుల గురించి ప్రస్తావిస్తూ, జనసేనకు టీడీపీ కేవలం 20 సీట్లకు మాత్రమే పరిమితం చేసిందంటూ జరుగుతున్న ప్రచారంపై కూడా పవన్ స్పందించారు. చేతులెత్తి మొక్కుతున్నా.. పొత్తుల గురించి తాను ఎక్కడా ఎలాంటి నిర్ణయం తీసుకోలేదన్నారు. చర్చలు జరపలేదన్నారు. వాట్సాప్ సందేశాలు చూసి మీరు నమ్మేస్తే ఎలా అని ప్రశ్నించారు. దశాబ్ద కాలం మీకు అండగా ఉన్నాను.. కనీసం నన్ను నమ్మండి. శంకించకండి అని విజ్ఞప్తి చేశారు. 
 
ఈ దఫా ఎన్నికల్లో జనసేన పార్టీ ఎట్టిపరిస్థితుల్లోనూ బలిపశువు కాబోదన్నారు. పైగా ప్రయోగాలు చేయనని స్పష్టంచేశారు. ఈ సారి గెలిచే విధంగానే ప్రణాళిక ఉంటుదని చెప్పారు. తనతో సహా గెలిచి తీరాలనే బరిలోకి దిగుతున్నామన్నారు. నాతో నడిచేవాడే నా వాడు.. నన్ను శంకించేవాడు నా వాడు కాదు అని స్పష్టం చేశారు. ఈ సారి గెలిచినా తర్వాత ఆవిర్భావ దినోత్సవం జరుపుకుందామని కార్యర్తల్లో ఉత్సాహం కలించే వ్యాఖ్యలు చేశారు. వచ్చే ఎన్నికల్లో ఓటును వృథా కానివ్వబోనని, జనసైనికులు వచ్చే ఎన్నికల్లో ఏం జరగాలని కోరుకుంటున్నారో అదే జరుగుతుందని చెప్పారు. రాష్ట్ర రాజకీయాల్లో జనసేన పార్టీది బలమైన సంతకం ఉంటుందని పవన్ కళ్యాణ్ స్పష్టం చేశారు.