స్కూల్లో చేర్పించే ముందు ఏం చేయాలంటే?
ఉద్యోగం కావచ్చు. మరో కారణం వల్ల కావచ్చు. పిల్లల్ని సంరక్షణ కేంద్రంలో దింపాలనుకుంటున్నారా? అంతకన్నా ముందు ఈ అంశాలపై దృష్టి పెట్టండి. మీరు అక్కడికి వెళ్లి పరిస్థితుల్ని సొంతంగా చూడకుండా పిల్లల్ని చేర్పించే ప్రయత్నం చేయొద్దు.
ముందు కాస్త అధ్యయనం చేయండి. మీ స్నేహితులూ, సహోద్యోగులూ, బంధువుల సాయం తీసుకోండి. అప్పుడు వాళ్లు తమ పిల్లల్ని ఉంచిన కేర్ సెంటర్లో ఉన్న సమస్యలూ, సౌకర్యాలను తెలియజేస్తారు. వాటి గురించి తెలుసుకున్న తర్వాతే సరైన దాన్ని ఎంచుకునే ప్రయత్నం చేయండి.
* అక్కడికి వెళ్ళాక కూడా నిర్వాహకులతో మాట్లాడి.. మీకు అవసరమైన వివరాలన్నీ అడిగి తెలుసుకోండి. ఈ రోజుల్లో ఉద్యోగం చేసే తల్లులు ఎక్కుడున్నా సంరక్షణ కేంద్రంలో తమ పిల్లలు ఎలా ఉన్నారని తెలుసుకునే అవకాశం ఉంది. అలాంటి సదుపాయాలు ఉన్నాయా లేవా అన్నదీ గమనించండి. దీనివల్ల చిన్నారుల విషయంలో మీరు చాలా శ్రద్ధ చూపిస్తారని అవతలి వారూ గుర్తిస్తారు.
* కేవలం సంస్థ యజమానే కాదు, అక్కడ పనిచేసే సిబ్బంది కూడా పిల్లలతో ఎలా వ్యవహరిస్తారనేది తెలుసుకోవాలి. చెప్పాలంటే.. వాళ్లూ పిల్లలతో సమానంగా ఆడాలి. అన్ని సమయాల్లో వాళ్ల పక్కనే ఉండి బాగోగులు చూసుకోవాలి. సాధ్యమైనంత సహనం వారిలో కనిపించాలి.
అలాగే ఎంతమంది పిల్లలు ఉన్నారనేది తెలుసుకోవడం కూడా అవసరమే. పిల్లల్ని ఉంచే గదులూ, భోజన శాల, ఆట స్థలం.. పరిశుభ్రంగా, సౌకర్యంగా ఉన్నాయా లేవా అన్నదీ గమనించాలి. లేదంటే పిల్లల్ని చేర్పించాక అనారోగ్య సమస్యలు మొదలవ్వొచ్చు. సంరక్షణ కేంద్రం వాళ్లకు నచ్చకపోవచ్చు.
