చంద్రయాన్-3 రాకెట్ ప్రయోగం సక్సెస్
చంద్రుడి అన్వేషణకు భారత అంతరిక్ష పరిశోధనా సంస్థ ఇస్రో చేపట్టిన చంద్రయాన్-3 రాకెట్ ప్రయోగం శుక్రవారం మధ్యాహ్నం 2.35 గంటలకు ప్రారంభమైంది. ల్యాండర్, రోవర్, ప్రొపల్షన్ మాడ్యూల్‌తో కూడిన చంద్రయాన్-3ని అత్యంత శక్తిమంతమైన ఎల్‌వీఎం-3 ఎం4 రాకెట్ నింగిలోకి తీసుకెళ్లింది. ఈ అరుదైన ఘట్టం మధ్యాహ్నం 2.35 గంటలకు ఆవిష్కృతమైంది. ఈ ప్రయోగం సక్సెస్ అయింది.
ఈ రాకెట్ చంద్రయాన్-3ని భూమి చుట్టూ ఉన్న 170X36,500 కి.మీ దీర్ఘవృత్తాకార కక్ష్యలో విజయవంతంగా ప్రవేశపెట్టనుంది. ఇది 24 రోజులు పుడమి చుట్టూ తిరుగుతుంది. ఆ తర్వాత క్రమంగా కక్ష్యను పెంచుతూ.. చంద్రుడి దిశగా లూనార్‌ ట్రాన్స్‌ఫర్‌ ట్రాజెక్టరీలోకి చంద్రయాన్-3ని పంపిస్తారు.
తిరుపతి జిల్లా శ్రీహరికోటలోని సతీష్ ధావన్ స్పేస్ సెంటర్ (షార్) ఈ ప్రయోగానికి వేదికైంది. ఈ కౌంట్‌డౌన్ గురువారం మధ్నాహ్నం 1.05 గంటలకు ప్రారంభమైంది. 25.30 గంటల పాటు నిరాటంకంగా కొనసాగిన ఆనంతరం బాహుబలి రాకెట్ ఎల్ వీఎం - ఎండి శుక్రవారం మధ్యాహ్నం 2:35 గంటలకు షార్‌లోని రెండో ప్రయోగ వేదిక నుంచి చంద్రయాన్-3 నింగిలోకి దూసుకెళ్లనుంది.
మొదట 24 గంటల కౌంట్‌డౌన్ ప్రారంభించాలని శాస్త్రవేత్తలు భావించారు. కానీ, స్వల్పమార్పులు చేసి కౌంట్ డౌ‌న్‌ను 25.30 గంటలకు పెంచి ప్రయోగం చేపట్టారు. ఈ రాకెట్ ద్వారా 3,900 కిలోల బరువున్న చంద్రయాన్-3 పేలోడ్‌ను రోదసీలోకి పంపించారు. రాకెట్ నుంచి విడిపోయాక వ్యోమనౌకను భూకక్ష్య నుంచి చంద్రుని కక్ష్య వరకూ మోసుకెళ్లే ప్రొపల్షన్ మాడ్యూల్, అక్కడి నుంచి చంద్రునిపై దిగిన తర్వాత పరిశోధనలు చేసేందుకు విక్రమ్ ల్యాండర్, ఉపరితలంపై తిరుగుతూ పరిశోధనలు చేపట్టే ప్రగ్యాన్ రోవర్ చంద్రయాన్‌లో ఉన్నాయి.
