ఆస్పత్రిలో కేసీఆర్ - వీల్ ఛైర్‌లో పోచారం.. బీఆర్ఎస్ శ్రేణుల్లో ఆందోళన
బాన్సువాడ నియోజకవర్గం నుంచి బీఆర్ఎస్ ఎమ్మెల్యేగా గెలుపొందిన సీనియర్‌ బీఆర్ఎస్ నేత, మాజీ స్పీకర్‌ పోచారం శ్రీనివాసరెడ్డి వీల్ చైర్‌లో కనిపించడం సంచలనంగా మారింది. డిసెంబర్ 8వ తేదీ ఉదయం మాజీ సీఎం కేసీఆర్‌ను చూసేందుకు యశోద ఆస్పత్రికి వచ్చిన పోచారం.. వీల్ చైర్‌తో ఆస్పత్రి లోపలికి వెళ్లారు. దీన్ని చూసి అభిమానులు ఆందోళన చెందుతున్నారు.
పోచారం శ్రీనివాస రెడ్డి కారు దిగి నడవలేని స్థితిలో ఉన్నాడు. అతని సహాయకులు అతన్ని అత్యవసర వార్డు ద్వారా ఆసుపత్రికి తరలించారు. పోచారం శ్రీనివాస రెడ్డికి 74 ఏళ్లు. గత అసెంబ్లీలో స్పీకర్‌గా పనిచేశారు. ఇప్పుడు కూడా బాన్సువాడ నుంచి ఎమ్మెల్యేగా గెలిచిన ఆయన డిసెంబర్ 9వ తేదీ శనివారం అసెంబ్లీలో ఎమ్మెల్యేగా ప్రమాణ స్వీకారం చేయాల్సి ఉంది.
ఇలాంటి సమయంలో పోచారం శ్రీనివాస రెడ్డి.. వీల్‌చైర్‌లో.. ఆస్పత్రికి వెళ్లడం చర్చనీయాంశంగా మారింది. ఆయన కేసీఆర్‌ను పరామర్శించేందుకు వచ్చారా లేక చికిత్స కోసం వచ్చారా అనేది తెలియాల్సి ఉంది. కేసీఆర్ ఆస్పత్రిలో.. పోచారం వీల్ చైర్‌లో కనిపించడం బీఆర్ఎస్ శ్రేణులను ఆందోళనకు గురిచేస్తోంది.
