అమేజాన్‌ గ్రేట్‌ ఇండియన్‌ ఫెస్టివల్‌ సేల్.. భారీ ఆఫర్స్, డిస్కౌంట్లు
దసరా, దీపావళి పండగ సీజన్‌ నేపథ్యంలో ప్రముఖ ఈ-కామర్స్‌ సంస్థ అమెజాన్‌ గ్రేట్‌ ఇండియన్‌ ఫెస్టివల్‌ను ప్రకటించింది. అక్టోబరు 17వ తేదీన ఈ ప్రత్యేక సేల్ ప్రారంభం కానుంది.
అయితే, ఎప్పటివరకూ ఈ ఫెస్టివల్‌ కొనసాగుతుందనే విషయాన్ని మాత్రం వెల్లడించలేదు. గ్రేట్‌ ఇండియన్‌ ఫెస్టివల్‌లో భాగంగా అమేజాన్‌లో వస్తువులు కొనుగోలు చేసేవారు హెచ్‌డీఎఫ్‌సీ డెబిట్‌/క్రెడిట్‌ కార్డును ఉపయోగించి పది శాతం ఇన్‌స్టాంట్‌ డిస్కౌంట్‌ను పొందవచ్చు.
షరతులకు లోబడి ఈఎంఐలపై కూడా ఇది వర్తిస్తుంది. ప్రైమ్‌ మెంబర్‌షిప్‌ కలిగిన వారు 24 గంటల ముందు నుంచే గ్రేట్‌ ఇండియన్‌ ఫెస్టివల్‌లో వస్తువులు కొనుగోలు చేసుకోవచ్చు.
ఈ సందర్భంగా అక్టోబరు 14న విడుదల చేసే వన్‌ప్లస్‌ 8టీ 5జీ ఫోన్‌, అక్టోబరు 15న తీసుకురానున్న అమేజాన్‌ ఫైర్‌ టీవీ స్టిక్‌ లైట్‌లను ఈ గ్రేట్‌ ఇండియన్‌ సేల్‌లో అమ్మకానికి తీసుకురానున్నారు.
వీటితో మొబైల్‌ ఫోన్లు, గృహోపకరణాలు, నిత్యావసర సరకులు, దుస్తులు, పుస్తకాలు, పిల్లల బొమ్మలపై కూడా రాయితీలు లభించనున్నాయి. బజాజ్‌ ఫిన్‌ సర్వ్‌ డెబిట్‌/క్రెడిట్‌ కార్డుపై వడ్డీ రహిత వాయిదాల్లో వస్తువులను కొనుగోలు చేయవచ్చు.
అదే సమయంలో అమేజాన్‌ యాప్‌లో రాత్రి 8గంటల నుంచి అర్ధరాత్రి వరకూ సాగే గోల్డెన్‌ అవర్స్‌లో మరికొన్ని వస్తువులపై నిబంధనల మేరకు ప్రత్యేక రాయితీ లభించనుంది.
