కామాంధుడికి బుద్ధి చెప్పిన శివంగి... రేప్ చేయబోతే మర్మాంగాన్ని కోసేసింది..
మధ్యప్రదేశ్ రాష్ట్రానికి చెందిన ఓ యువతి కామాంధుడిపై శివంగిలా దాడి చేసింది. తనను రేప్ చేసేందుకు వచ్చిన కామాంధుడికి మగతనం లేకుండా చేసింది. మర్మాంగాన్ని కోసేసింది. ఈ ఘటన రాష్ట్రంలోని సిధీ జిల్లా ఉమరియా గ్రామంలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, ఉమరియా గ్రామానికి చెందిన ఓ మహిళ తన భర్త బయటకు వెళ్లడంతో ఇంట్లో ఒంటరిగా ఉన్నది. దీన్ని గమనించిన ఓ కామాంధుడు ఇంట్లోకి చొరబడి ఆమెపై అత్యాచారానికి యత్నించాడు. అయితే, ఆ మహిళ ఆ కామాంధుడిపై శివంగిలా దాడిచేసి, మర్మాంగాన్ని కోసివేసింది. ఈ ఘటన గురువారం రాత్రి 11 గంటలకు ఈ ఉదంతం జరిగిందని ఖాదీ ప్రాంత ఎస్సై ధర్మేంద్ర సింగ్‌ రాజ్‌పుత్‌ తెలిపారు.
ఆ సమయంలో తన భర్త పని మీద వేరే ప్రాంతానికి వెళ్లినట్లు మహిళ(45) చెప్పిందని వెల్లడించారు. 13 ఏళ్ల కొడుకు కూడా మహిళతో పాటు ఉన్నాడని చెప్పారు. నిందితుడు(45) ఇంట్లోకి చొరబడగానే.. దొంగలు వచ్చారని భయపడి కొడుకు బయటకు పరుగులు తీశాడని వివరించారు.
'మహిళను కొట్టి లైంగికంగా దాడి చేసేందుకు నిందితుడు యత్నించాడు. 20 నిమిషాలకు పైగా నిందితుడిని మహిళ నిలువరించింది. తనను తాను కాపాడుకునేందుకు మంచం కింద ఉన్న కొడవలి తీసి.. నిందితుడి మర్మాంగాన్ని కోసేసింది. తర్వాత పోలీస్‌ స్టేషన్‌కు వచ్చి ఫిర్యాదు చేసింది' అని ఎస్సై ధర్మేంద్ర సింగ్‌ రాజ్‌పుత్‌ వివరించారు. దీనిపై కేసు నమోదు చేసి విచారణ జరుపుతున్నట్టు తెలిపారు.
