భార్యను హనీమూన్‌కు తీసుకెళ్లేందుకు రూ.10 లక్షలు డిమాండ్ చేసిన భర్త
అగ్నిసాక్షిగా వివాహం చేసుకున్న భార్యను హానీమూన్‌కు తీసుకెళ్లేందుకు కట్టుకున్న భర్త ఏకంగా రూ.10 లక్షల మేరకు డిమాండ్ చేశాడు. ఆ తర్వాత హానీమూన్‌కు తీసుకెళ్లి... అక్కడ భార్యతో అశ్లీల వీడియోలు తీశాడు. ఆ తర్వాత మరింత డబ్బులు కావాలంటూ బెదిరింపులకు దిగాడు. ఈ ఘటన ఉత్తరప్రదేశ్ రాష్ట్రంలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే,
రాష్ట్రంలోని బదాయూకు చెందిన నిందితుడు పీలీభీత్‌లో ఉంటున్న యువతిని ఫిబ్రవరిలో వివాహం చేసుకున్నాడు. అతడు పెళ్లి తర్వాత తొలి రాత్రి జరుపుకోలేదు. అలా కొంతకాలంగా దూరం పెడుతూ వచ్చాడు. ఈ విషయం తెలిసిన అత్తింటివారు ప్రశ్నించగా, రూ.10 లక్షలు ఇస్తేనే తన భార్యను హానీమూన్‌కు తీసుకెళ్తానని కరాఖండిగా తేల్చి చెప్పాడు.
దీంతో వారు అతడికి రూ.5 లక్షలు ఇవ్వగా, ఈ నెల 7వ తేదీన భార్యాభర్తలిద్దరూ హానీమూన్‌ కోసం నైనిటాల్‌ వెళ్లారు. అక్కడ భార్యను అసభ్యకరంగా ఫొటోలు, వీడియోలు తీశాడు. మరో రూ.5 లక్షలు తీసుకురాకపోతే వాటిని వైరల్‌ చేస్తానని బెదిరించాడు. భర్త చేష్టలతో విసిగిపోయిన బాధితురాలు.. 13న తన పుట్టింటికి చేరుకుంది. ఆ తర్వాత బాధితురాలు అత్త, భర్తపై పోలీసులకు ఫిర్యాదు చేసింది. దీనిపై కేసు నమోదు చేసిన పోలీసులు విచారణ జరుపుతున్నారు.
