డబ్బుంటే కాదు.. రాత్రికి రాత్రే విజయం సాధ్యం కాదు!
ఒకేసారి పని పూర్తి చేయడం, రాత్రికి రాత్రి విజయం సాధించడం సాధ్యం కాదు. ఏదైనా చిన్నగా మొదలుపెట్టాలి. లక్ష్యానికి సంబంధించి రోజూ కొంత చొప్పున పని చేసుకోవాలి. అప్పుడే సరైన దిశలో వెళ్తున్నామా లేదా అన్న దానిపై అవగాహన వస్తుంది. అలాగే విజయ సాధనకు చాలా ముఖ్యమైంది... ప్రతికూల ఆలోచనలు లేకపోవడం, సందేహాలు, భయాలు, ఒత్తిడి, ఆందోళన లాంటివి పెరిగిపోతే మీరు మీ కలలు నెరవేర్చుకోలేకపోతారు. అందుకే సాధ్యమైనంతవరకు సానుకూల అంశాలకే ప్రాధాన్యం ఇవ్వండి.
బాగా డబ్బుంటే విజయం వచ్చేస్తుందంటారు. ఇది నిజం కాదు. ఎవరైనా సరే కష్టపడాల్సిందే. అందుకే ఓసారి విజయం సాధించినవారితో మాట్లాడి చూడండి. వాళ్లెంత శ్రమపడ్డారో, ఎన్ని త్యాగాలు చేశారో, ఎలాంటి వైఫల్యాలు ఎదుర్కొన్నారో వివరిస్తారు. సాధించాలనుకున్న లక్ష్యానికి సంబంధించి మీకు అన్నీ తెలుసు అనుకుంటే మీరు దానిపై శ్రద్ధ పెట్టడం లేదని అర్థం. నిత్యం మారిపోయే పరిస్థితులూ, వ్యక్తులూ, సవాళ్లనూ దృష్టిలో పెట్టుకుని నేర్చుకుంటూ ముందుకు సాగాలి. దీనికోసం కొత్త నైపుణ్యాల్లో శిక్షణ తీసుకోండి. పుస్తకాలు చదవండి. డాక్యుమెంటరీలను చూడండి. అధ్యయనం చేయండి.
