నేను క్షేమంగా ఉన్నానంటూ హీరో ధర్మేంద్ర వెల్లడి
తన ఆరోగ్యంపై సోషల్ మీడియాలో జరుగుతున్న ప్రచారంపై బాలీవుడ్ సీనియర్ నటుడు ధర్మేంద్ర స్పందించారు. తాను క్షేమంగా ఆరోగ్యవంతంగా ఉన్నట్టు ఇన్‌స్టాగ్రామ్ వేదికగా ఆయన వివరణ ఇచ్చారు. 86 యేళ్ల ధర్మేంద్ర అనారోగ్యంతో బాధపడుతూ ఆస్పత్రిపాలైనట్టు సోషల్ మీడియాలో ఓ వార్త చక్కర్లు కొడుతోంది. దీన్ని ఆయన ఖండించారు. తాను పూర్తిగా ఆరోగ్యంగా ఉన్నట్టు వివరణ ఇచ్చారు. దయచేసి వదంతులు నమ్మొద్దని ఆయన కోరారు.
పైగా, తాను మౌనంగా ఉన్నాను తప్పితే అనారోగ్యంగా లేనని చమత్కరిచారు. ఇతరులకు ప్రేమను పంచితే జీవితం అందంగా ఉంటుందన్న ధర్మేంద్ర.. తన ఆరోగ్యం గురించి వస్తున్న వదంతులను నమ్మొద్దని హితవు పలికారు. అలాగే, తన తండ్రి ఆరోగ్యంపై సాగుతున్న ప్రచారాన్ని కూడా ఆయన కుమారుడు బాబీ డియోల్ ఖండించారు.
నిజానికి నెల రోజుల క్రితం ధర్మేంద్ర రొటీన్ చెకప్‌లలో భాగంగా, ముంబైలోని బ్రీచ్ కాండీ ఆస్పత్రికి వెళ్లి వైద్య పరీక్షలు చేయించుకున్నారు. ఆ తర్వాత ఆయన ఆస్పత్రికి ఎందుకు వెళ్లారో కూడా ట్విట్టర్ ఖాతాలో వివరించారు. నడుం నొప్పి ఉండటంతో ఆస్పత్రికి వెళ్లానని, అందువల్ల ఆందోళన చెందాల్సిన అవసరం లేదని చెప్పారు. కానీ, ఇపుడు ఆయన ఆరోగ్యంపై వందతులు ప్రసారమవుతున్నాయి.
