కోడిగుడ్డును తీసుకంటే.. అందంతో పాటు ఆరోగ్యం కూడా మీ సొంతం.. (video)
కోడిగుడ్డు ఆరోగ్యానికి ఎంతో మేలు చేస్తుంది. శరీరానికి కావలసిన విటమిన్-ఎని గుడ్డు అందిస్తుంది. శరీరం బలహీనంగా ఉంటే రోజుకో ఉడకబెట్టిన గుడ్డు తినమని వైద్యులు సూచిస్తున్నారు. ఉడకబెట్టిన గుడ్డులో ఎ విటమిన్‌తో పాటు అన్ని రకాల సూక్ష్మపోషకాలు లభిస్తాయి. రోజుకి ఒక గుడ్డు తినడం అలవాటు చేసుకుంటే అందంతో పాటు ఆరోగ్యం కూడా మీ సొంతం అవుతుందని ఆరోగ్య నిపుణులు సూచిస్తున్నారు.
అలాగే విటమిన్ ఏ కాలేయం, చేపలు, రొయ్యల్లో అధికంగా ఉంటుంది. ఇంకా పాలు, పాలపదార్థాల్లో కూడా సమృద్ధిగా లభిస్తుంది. క్యారెట్, చిలకడదుంప, ఆకుకూరలు, టొమాటో, క్యాప్సికం, బొప్పాయి, గుమ్మడి ఇలా ఆయా సీజన్లలో దొరికే తాజా పండ్లు తీసుకున్నా విటమిన్ ఎ శరీరానికి అందుతుంది.
ఇంకా కోడిగుడ్లలో ఉండే తెల్లనిసొనను రోజూ తినడం వల్ల శరీరంలో కొలెస్ట్రాల్ చేరదు. దీంతో గుండె సంబంధ వ్యాధులు రాకుండా ఉంటాయి. బరువు తగ్గాలనేకునేవారికి కోడిగుడ్లలో ఉండే తెల్లసొన చక్కగా పనిచేస్తుంది. దీంతో చాలా తక్కువ క్యాలరీలు వస్తాయి. దీనికి తోడు తెల్లసొన తింటే ఎక్కువ సేపు ఉన్నా ఆకలి వేయదు. దీంతో తక్కువగా ఆహారం తీసుకుంటారు. ఫలితంగా బరువు అదుపులో ఉంటుంది.
కోడిగుడ్లలో ఉండే తెల్లసొనను రోజూ తీసుకుంటే దాంతో హైబీపీ తగ్గుతుందని ఆరోగ్య నిపుణులు సూచిస్తున్నారు. తెల్లసొనలో ఉండే ప్రోటీన్లు మన శరీరంలో కండరాల నిర్మాణానికి పనికొస్తాయి. దీంతో కండరాలు దృఢంగా మారుతాయి. అందుచేత రోజుకో గుడ్డును పిల్లలకు ఇవ్వడం అలవాటు చేస్తే వారిలో పెరుగుదల వుంటుంది.
